हिन्दूकरण गरिनु चाहिँ धर्म परिवर्तन होइन ? by श्रवण बोम्जन

10Jul, 2015

यदि ईश्वरमाथि गरिने विश्वास र आस्थालाई नै धर्म भनिन्छ भने र कसैले बुबाआमाले मानिआएको ईश्वर छोडेर आफ्नो आत्मकेन्द्रित बाटोमा लाग्छ भने, यसको इनामस्वरुप तिनीहरूलाई धर्मपरिवर्तनकारी वा धर्मबेचुवाको उपनाम दिइने हो भने, मेरा ती तमाम प्रश्नकर्ता मित्रहरूलाई सोध्नको निम्ति मसँग पनि एउटा प्रश्न छ । म एउटा नास्तिकको छोरो ख्रिष्टियन हुँदा कुन धर्मपरिवर्तन भयो ?मेरा कतिपय मित्रहरूले मलाई बुबाआमाको धर्म बेचेर खाइस् भन्छन् । मलाई अचम्म लाग्छ कि मैले कुन धर्म बेचेको कुरा गर्दैछन् उनीहरू ? हरेक मानवतामा हुने धर्मलाई किन्न र बेच्न मिल्छ र ? मैले मेरो बुबाआमाको धर्म बेच्नलाई त्यो कुनै बस्तु हो र ? खोस्न मिल्ने कुनै भौतिक तत्व हो र ? मेरो मनमा घरीघरी उठेको प्रश्न यो हो कि कुन आधारमा म बुबाआमाको धर्म बेचुवा ठहरिएँ ?

मेरो बुबा ख्रिष्टियान होइनन् । तर पनि आजसम्म मैले मेरो बुबाको निधारमा कहिल्यै रातो टीका देखेको छैन । मन्दिरमा गएर पूजा गरेको देखेको छैन । मेरो बुबा जनयुद्धकालको माओवादी कार्यकर्ता हुनुहुन्थ्यो । मलाई अझै पनि सम्झना आउँछ, त्यसबेला उहाँ शोषक, सामन्तीको विरुद्धमा बन्दुक उठाउनु नै मेरो धर्म हो भन्नुहुन्थ्यो । शोषणमा परेकालाई उद्धार गर्नु र गरिबको उन्मुक्तिको निम्ति लड्नु नै मुक्ति पाउनु हो भन्नुहुन्थ्यो । 

कम्युनिष्टको छोरा ख्रिष्टियान हुँदा कुन धर्म परिवर्तन भयो ? नास्तिकको छोरा आस्तिक हुँदा कुन धर्मपरिवर्तन भयो ? कसैले मलाई यसको उत्तर दिनुहुन्छ भने, कृपया मलाई यसको पनि उत्तर दिनुहोस्- आदिवासी, जनजातिका सिङ्गो समुदायलाई हिन्दुकरण गरिँदा चाहिँ धर्म परिवर्तन भएन ?

म सानो छँदा यो ईश्वरलाई पूजा गर् भनेर मलाई मेरो बुबाले कहिल्यै सिकाउनुभएन । मेरो बुबाले पुजेको ईश्वरलाई मैले कहिल्यै पछ्याएको थिइनँ । उहाँको ईश्वर त बन्दुक थियो । उहाँले पाउने मुक्तिको निश्चयता त युद्धमा लडेर कसैको प्राण लिनु अनि आफू जिउनुमा थियो ।

आज म इसाई आस्थामा येशूमा शरण लिएर, मेरो बुबाले अपनाएको बाटोभन्दा फरक बाटोलाई अँगालेर हिंड्दा म धर्मपरिवर्तनकारी भएँ ? बुबाआमाको धर्म बेचुवा भएँ ?

यदि मैले पनि मुक्तिको लागि बन्दुक उठाएको भए र बुवाको धर्म जोगाउन युद्धको मैदानमा निस्केको भए चाहिँ म धर्म जोगाउने हुने थिएँ, हो र ? तपाईंहरू त परिवर्तन चाहने हरेकलाई डलरमा बिकेका भन्न र स्वेच्छाले आफ्नो आस्थामा लागेकाहरूलाई देश बेच्ने, आमा बेच्ने भनेर आफै तमासा बन्नुभएको छ ।

यदि मलाई धर्मपरिवर्तनकारी भन्नुहुन्छ भने, कहिल्यै परिवर्तन नभएको तपाईंको धर्म ल्याएर दिनुहोस् मलाई । दिन मिल्ने र लिन मिल्ने धर्म तपाईहरूसँग भए ल्याउनुहोस् । मेरो बुबाआमाको धर्म मैले कसैलाई बेचेको प्रमाण भेटेमा आएर मलाई कानुनी कठघरामा उभ्याउनुहोस् । कानुन बमोजिम मलाई सजाय दिइयोस् ।

जब म ८ वर्षको थिएँ, सैन्यदल र दंगा पुलिसको हुलले मेरो घरलाई खरानी बनाउँदा पनि मेरो बुबाआमाले कुनै ईश्वरलाई पुकारेको मैले सुनिनँ । रातरात जङ्गलमा दौडेको याद छ मलाई । र पनि त्यहाँ धर्म र कुनै ईश्वरको आशालाई खोजेको झिनो शंका पनि गर्न सक्ने आस्तिकता देखिन मैले । 

केही त्यस्ता फटाहाहरू पनि जसले पैसाको खेती गरिरहेका छन् । तिनीहरूलाई त हातको औंलाले गन्न सकिन्छ । तर सिङ्गो ख्रिष्टियानहरूमाथि लगाइने लान्छनालाई म स्वीकार गर्दिनँ । यसो त मन्दिरमा पनि बर्सेनी अरबौं रुपैयाँको भ्रष्टाचार हुन्छ; के हिन्दू धर्मले भ्रष्टाचार गर्‍यो भन्नू उचित हुन्छ र ?

मैले मेरो परिवारले पूजाको थाली बोकेर मन्दिर गएको कहिले पनि देखिनँ । तथापि हाम्रो गणना हिन्दूअन्तर्गत नै पर्दथ्यो । दशैं आउँथ्यो मासु खाइन्थ्यो, तिहार आउँथ्यो टीका लगाइन्थ्यो । तर हामीलाई कुन भगवानको आचरण थाहा थियो र ? मेरो परिवारले कुन देउताको गुणलाई जानेको थियो र ? कुन धर्मग्रन्थ पढेर बुझ्न पाएका थियौं र हामीले ? ईश्वरलाई नजान्ने मेरो परिवार भित्रबाट राजिखुशीले म ख्रिष्टियनमतमा जिउँदा डलरमा बिकेको भएँ ?

आदरणीय मित्रहरू ! एक जमाना यस्तो थियो, यो देशका हरेकलाई हिन्दू भनिन्थ्यो । तर आज यो सम्भावना टुंगिएको छ ।

गणतन्त्रको उदयसँगै हरेकले आफ्नो जिउने अधिकार र स्वतन्त्रताको निम्ति आवाज उठाउन थालेका छन् । तपाईंहरू भन्नुहुन्छ हिन्दू नभए आमा बेच्ने, धर्म बेच्ने, डलरमा बिक्ने ।

यदि ख्रिष्टियनमत अपनाउँदा डलर पाउने भए, १६ वर्षको उमेरमा १९ वर्षको नागरिता बनाएर खाडी देशमा म किन भाँडा मस्काउन जान्थें होला र ? साँच्चै डलर पाउने भए पशुपति र रत्नपार्कको सडकपेटीमा बस्नेहरू, ५० रुपैयाँमा अरूको भाग्य देखाउन छोडेर आफ्नै भाग्य बनाउन ख्रिष्टियन हुँदैन थिए र ? के एउटा टपरी बोकेर रोडमा धुलो खाएर बस्नुको सट्टा डलर कमाउन आउने थिएनन् र ? तपाईंहरू हिन्दुत्व मात्र यो देशमा हुनुपर्छ भन्ने मनसायमा हुनुहुन्छ । त्यसैले अरूको आस्थालाई पैसा खाने, धर्म बेच्ने, आमा बेच्ने भनेर आलोचना गर्न छोडनुभएको छैन ।

ख्रिष्टियानहरूलाई डलरमा बिक्ने भनेर आरोप लाउने गरेको कुरालाई म पनि स्वीकार गर्छु । तर दोष लगाउने, तपाईंहरूको भाषामा होइन । हो छन् केही त्यस्ता फटाहाहरू पनि हाम्रो समुदायभित्र; जसले पैसाको खेती गरिरहेका छन् । तिनीहरूलाई त हातको औंलाले गन्न सकिन्छ । तर सिङ्गो ख्रिष्टियानहरूमाथि लगाइने लान्छनालाई म स्वीकार गर्दिनँ । यसो त मन्दिरमा पनि बर्सेनी अरबौं रुपैयाको भ्रष्टाचार हुन्छ; के हिन्दू धर्मले भ्रष्टाचार गर्‍यो भन्नू उचित हुन्छ र ? कि मन्दिरमा काम गर्ने फलानोले भ्रष्टाचार गर्‍यो भन्नु उचित हुन्छ ?

पैसा खानेहरूलाई, पैसामा राज गर्नेहरूलाई मन्दिर र चर्चबाट सफा गर्न चाहाहुन्छ ? आउनुहोस्, एउटा अभियान सुरू गरौं, हामी साथ दिन तयार छौं । तर हामीमाथि लागेका नक्कली आरोप सहन हामी तयार छैनौं । हिन्दुत्व स्वीकार नगर्ने हरेकलाई दोष लगाउन हामी छोड्दैनौं भनेर तपाईंहरू भन्नुहुन्छ भने, तपाईंहरूको विवेकले सस्तो ज्ञान कमाएको कुरालाई नकार्न सकिँदैन ।

यदि म गलत हुँ भने, तपाईंहरूलाई पनि मेरो एउटा प्रश्न :
आदिवासी जनजातिका सिंगो समुदाय हिन्दुकरण हुँदा चाहिँ धर्म परिवर्तन भएन ? हिन्दू नाम नै नसुनेका देश आज हिन्दूहरू बहुल भएको देश भनिँदा चाहिँ धर्म परिवर्तन नहुने ? र ३% नेपालीले आफ्नो स्वेच्छाले कुनै आस्थामा विश्वास राख्दा चाहिँ धर्म परिवर्तन भयो ?

हिन्दुत्वको नाउमा इतिहासमा धेरै षड्यन्त्र भइसकेको छ । हिन्दु शब्दले हाम्रो पुर्खाहरुको आत्मस्वतन्त्रतालाई खोसेको थियो । हाम्रा ऐतिहासिक पुर्खाहरुका आकांक्षा र मानवअधिकारमाथि खेलबाड गरेको थियो । उनीहरूको स्वतन्त्रतामा बलात्कार भएको थियो । कहिल्यै नसुनेको हिन्दुत्वमा जबर्जस्ति झुकाव राख्न बाध्य बनाएको थियो । त्यसमा चाहिँ कसैले धर्म परिवर्तन देखेन ?

आज मानव स्वतन्त्रताको स्वविवेकमा रहेर मैले (हामीले) इसाई आस्था अपनाउँदा धर्म परिवर्तन भयो ? आमाबुबा बेचुवा भएँ ?

सामाजिक संजालमा इसाईहरूका पोष्टहरूमा कमेन्ट गर्ने हिन्दू भन्नेहरूमध्येका ९८% ले छाडा कुरा लेख्ने, अश्लिल फोटो पोस्ट गर्ने, अनि मुनिपट्टि जय हनुमान, जय राम, जय हिन्दू लेखेको हुन्छ । तपाईंहरूले त्यसरी अश्लिल शब्द, तस्विर पोष्ट गरिरहँदा तपाईंको भगवानलाई खुशी लाग्छ होला र ? म ग्यारेन्टी दिन्छु कुनै त्यस्तो क्रिश्चियन देखाउनुहोस् जसले हिन्दू पोस्टहरूमा अश्लील कुरा लेख्छ र पोस्ट गर्छ । यदि तपाईंहरूले देखाउन सक्नुभएन भने तपाईंहरूलाई लाज हुनुपर्ने हो । देखाउन सक्नुहुन्छ भने त्यसको बारेमा लेख्नुस्, बोल्नुस्, हामी सहन्छौं । नत्र त किन अरूलाई विरोध गर्ने बहानामा आफ्नो भगवानको वदनाम गर्नुहुन्छ ?

बाइबललाई मैले आफूले बुझ्ने भाषामा पढ्न पाएको छु । यही ईश्वरशास्त्र मैले पढें । यसले नै मलाई उपदेश दिन्छ । यसकै माध्यमबाट मैले ख्रिष्टियनमत पक्रेको छु । मेरो जीवनको मोक्षको निम्ति म इसाई आस्थामा तल्लिन भएर जिउँछु । मेरो स्वेच्छाले । कसैले यहाँ मेरो आत्मिक आकांक्षाको हत्या गर्न खोज्छ भने त्यो मूर्ख हो । मेरो इच्छाले आपनाएको आस्थामा म मोहित भएर जिउँछु । यो मेरो अधिकार हो ।

प्रिय मित्रहरू, परिवर्तन गर्न मिल्ने धर्मको विरोध गर्नुहोस् । तर परिवर्तन नै नहुने धर्मको कसरी विरोध गर्नुहुन्छ ? मेरो बुबालाई मनपर्ने कुनै भगवान थिएन । मनपर्ने कुनै मन्दिर थिएन । उसैको छोरा आत्मा शान्ति र आत्मारुचिले डोर्‍याइएर ख्रिष्टियान मतमा जिउँदा, कुन धर्मपरिवर्तन भयो ? कम्युनिष्टको छोरा ख्रिष्टियान हुँदा कुन धर्म परिवर्तन भयो ? नास्तिकको छोरा आस्तिक हुँदा कुन धर्मपरिवर्तन भयो ?

कसैले मलाई यसको उत्तर दिनुहुन्छ भने, कृपया मलाई यसको पनि उत्तर दिनुहोस्- आदिवासी, जनजातिका सिङ्गो समुदायलाई हिन्दुकरण गरिँदा चाहिँ धर्म परिवर्तन भएन ?

बाट साभार http://esamata.com/np